“Hawikom ttha” timi tlangtar ka von khenh lio ahhin “Hawithar kawl, na hawihlun philh hlah. Hawikom ttha cu sui le ngun an si,” timi hla khi ka thinlung ah duak tiah a hung chuak. Church School kan kai lio ah rak sak tawnmi hla a si i ngakchiat lio caan ngaih a um ngai. Hawikom ttha timi hi suingun chawva he tahchunhmi, le a sunglawi tukmi a si. Aho kan sihmanh ah hawikom ttha ngeih a duhmi kan si.
Asinain “Hawikom ttha” timi hi chawdawr ah awl tein va cawk khawh mi thil a si lo. Caan tampi cu hawikom ttha timi hi kan minung hawi hna sinah kan kawl tawn, a si lo ah phaisa hna hi hawikom ttha taktak ah kan ruah caan zong a um ko lai nain diriamnak taktak kan hmu thlu lo. Asinain kei nih kan siaherhmi hawikom ttha cu a caan ah na kut chungah silole na zalrang chungah maw, cun na cabuai cung tbk. zong ah a um kho.
Na komh hlan in amah nihcun hawikom ah a rak in ser hmanh kha na thei kho lo men. Amah he nan umtti ahcun naa nuam lai, na thinlung a zaang sup lai. Mah na hawi nihcun na innchungkhar ah lawmhnak thlam a lenter zungzal lai. A seihnam cu a zaan caah na thilrit vialte an chawn dih fawn lai. Nifa khuasak tintuknak ah lung retheihnak samfang ngaw hmanh um loin an zoh khenh lai. A thukbikmi muihnak chung i lam na pial caan hmanh ah an zaam tak lai lo. Na ngaihchiat caan ah mitthli hultertu le lawmhnak na ton caan ah an lawmhpitu hawikom ttha a si lai. A nun a nem i a thin a fual caah a cung i na tuahsualmi thil zong a thinlung ah a chia lai lo, an ngaihthiam lai. Thlichia tilet nih an den caan ah na himnak lungpi a si lai.
Fimthiamnak in cuaithlai a hmang lo. Thleidannak ngei loin mi vialte a komh khawh dih hna. A lungput a ttha i mi vialte cungah zaangfah dawtnak a ngei. Harnak na ton caan ah an bawmtu ding ah timhcia in a um zungzal. Na caah mitthlitla tiang in thlacam kho mi le a nunnak a thap ngammi hawi ttha a si. Na tlamtlinlonak le na chanbaunak vialte an philhkharpiaktu, na ral hna hmai ah na lu ah chiti an thuh lai.
Nangmah lawng na um caan ah hovanhai loin an komh lai. Nikhat ah suimilaam pakhat tel caan pek in kom chin hmanh na thlahkho ti lai lo. Galilee Rili kam ah lam an hruai lai. Peter sinah nga na tlai lai. Paul he hawikom na vun si lai. Ramsa phuntling hna he Eden dum chungah khua na sak chel, vawleipi na philh caan hmanh rel cawk si lai lo. Aphunphun in an thlim lai. Khuaruah har hawikom ttha a si.
Atu hin hawikom ttha ah i ser cio hna usih! A min ah “Baibal Thiang” ti a si.
source - http://www.globalchin.org
No comments:
Post a Comment