Sihmanhselaw Thlarau nih a chuahter mi hna cu; dawtnak, lawmhnak,daihnak, lungsaunak, zangfahnak, thatnak, zumhawktlakmi sinak, toidornak le mah le mah i tei khawhnak hi an si. Cu bantuk thil hna caah cun nawlbia zeihmanh a herh lo (Galati 5;22,23).
Galatia ramchung khrihfa bu cheukhat nih cun Pathian he i rem nan duh ahcun Moses Nawlbia kha nan zulh hna awk a si, an hung ti hna. Asinain Pual nih cun Pathian he i remnak cu zumhnak thawng lawnglawng in a sinak kha a chim i, zumhnak nih a chuahpimi Thlarau theipar tu kha a chim ve. Jeim cakuat nih zumhnak cu tuahsernak in kan langhter ding a si tiah fakpi in a chim.
Zumhnak le tuah sernak; Thlarau le theipar hi, khrihfa ka si ai ti ve mi zong nih kan ni fiang tawn lo, cu caah kan tuah sernak a tthat ruang ah Pathian zumtu ttha kan si tiah kan mah le mah kan ni ruah tawn. Mi cheu nih Pathian he i remnak cu zumhnak thawng in a si caah tuah sernak, Thlarau theipar cu a herh lo tiah kan ruah tawn. Tuah sernak ttha/Thlarau theipar kan ngei ruang ah Pathian zumtu kan si lo, Zumtu kan si ruang ah tuah sernak ttha le Thlarau theipar in a khat mi fapa/fanu ttha kan siawk a si.
Thlarau le theipar ttha cu zumhnak chung ah khua an sa. Chim duh mi cu zumhnak le tuah sernak; Thlarau le theipar ttha hi thlen awk an ttha lo. Zumtu cu a ngan a dam mi thing kung bantuk kan si. A ngan a dam mi thingkung nih thei ttha aa tlai i, a thei le a kung vun zoh tik ah zeibantuk thiangkung a si ti theih khawh a si. Cu bantuk in khrihfa, hrin tthan mi, zumhtu ttha cu kan nunzia ah Thlarau theipar kan par ding a si ve. Kan nun zia le kan tuah sernak hi zum lotu caah Pathian hmual a si ti theih buh in, ni fatin kan nunnak ah Thlara theipar in khah i zuam cio hna uh sih.
Thlarau theipar cu Galati 5;22,23 chung ah fiang tein kan hmuh. Cu Thlarau theipar in a khat mi kan si khawhnak hnga Khrih he pehtleih nun kan herh.Johan 15;4a Keimah ah hin i peh ko u law kei zong nanmah he kaa peh ve lai.
Note; Ka hawi pa ka hal hnu ah mah sermon hi ka rak thlah mi a si. Sermon tuah tu cu ka si lo nain sia herhnak he midang sermon tuah mi ka rak thlah ve ko hih.
source- http://www.globalchin.org
No comments:
Post a Comment